PRESS STATEMENT

Jum il-Konsumatur, 15ta’ Marzu 2008

Kull min ser ikun għaddej minn Triq ir-Repubblika fil-Belt Valletta għada filgħodu ser ikollu l-opportunita jsaqsi mistoqsijiet dwar id-drittijiet tiegħu bħala konsumatur lil uffiċċjali ta’ l-informazzjoni mid-Diviżjoni tal-Konsumatur u l-Kompetizzjoni u miċ-Ċentru Ewropew tal-Konsumaturi, fl-okkażjoni ta’ Jum il-Konsumatur.

Jum il-Konsumatur hija attività ċċelebrata madwar id-dinja kull sena fil-15 ta’ Marzu. Din is-sena, bħala parti mill-kampanja ta’ informazzjoni dwar id-drittijiet tal-konsumatur li għaddejja bħalissa f’pajjiżna, il-Kummissjoni Ewropea qed taħdem id f’id mad-Diviżjoni tal-Konsumatur u l-Kompetizzjoni u maċ-Ċentru Ewropew tal-Konsumaturi biex tittella’ tinda quddiem il-Qorti bil-għan li tinħoloq aktar kuxjenza dwar id-drittijiet tal-konsumatur f’pajjiżna. Matul l-attivita, ser jitqassam materjal informattiv lil dawk preżenti, li wkoll ser ikollhom iċ-ċans jiltaqgħu mal-persunaġġ Ray Calleja, ‘il-wiċċ’ tal-kampanja edukattiva tal-Kummissjoni Ewropea dwar id-drittijiet tal-konsumatur.

L-attivita ser tibda b’konferenza stampa fl-10:00am li ser tkun indirizzata minn Dr Joanna Drake, Kap tar-Rappreżentanza tal-Kummissjoni Ewropea f’Malta, minn Dr Mireille Vella, Direttur tad-Diviżjoni tal-Konsumatur u l-Kompetizzjoni u mis-Sur Claude Sammut, Manager taċ-Ċentru Ewropew tal-Konsumaturi f’Malta.

Il-messaġġ prinċipali tal-Kummissjoni Ewropea lill-konsumaturi din is-sena, kif spjegat il-Kummissarju Ewropea responsabbli mill-Affarijiet tal-Konsumatur Meglena Kuneva aktar kmieni din il-ġimgħa, huwa: “Kun af id-Drittijiet Tiegħek. Uża d-Drittijiet Tiegħek”. Huwa appell lill-konsumaturi biex jinfurmaw ruħhom dwar il-drittijiet tagħhom bhala konsumaturi u sabiex jieħdu dak li hu tagħhom bi dritt!

Il-konsumaturi huma mħegga jikkuntattjaw lill-Consumer House fuq 2122 1901 jew lid-Diviżjoni tal-Konsumatur u l-Kompetizzjoni fuq 8007 4400, jew iżuru s-sit ta’ l-Għaqda tal-Konsumaturi www.camalta.org għal aktar informazzjoni.